Gipikhan ni Leyte Fourth District Representative Richard Gomez ang self-confessed drug lord ug kandidato sa pagka mayor sa Albuera, Leyte nga si Roland “Kerwin” Espinosa tungod sa paghilambigit ni Espinosa sa pangalan ni Gomez kabahin sa insidente diin adunay nisuway pagpatay kang Espinosa.
Si Gomez, bana ni Ormoc City Mayor Lucy Torres, niingon nga padayon pa siya sa pagpakisusi bahin sa insidente, apan sa inisyal nga lakang, nasuta nga daghang sayop ang mga gipanulti ni Espinosa.
“Do not believe somebody like him who has no credibility and a self-confessed drug lord. He will not do anything good for mankind,” matod ni Gomez. “Honestly, para sa akin scripted ‘yung ambush me. Ang pangit ng acting, ang pangit ng pagkagawa.”
Si Espinosa, hasta ang iyang igsuong babaye nga si Mariel Espinosa-Marinay, kinsa kandidato sa pagka bise mayor, ug usa ka menor de edad, nasamdan sa insidente sa pagpamusil atol sa ilang kampanya sa Barangay Tinag-an niadtong Huwebes, Abril 10, 2025.
Naigo si Espinosa sa bala nga nisulod ug nigawas sa tuo nga bahin sa iyang dughan.
Pito ka mga pulis sa Ormoc City Police Office, apil na ang hepe nga si Colonel Reydante Ariza, gipailawom sa kustodiya samtang gipadayon ang imbestigasyon sa ilang giingong kalambigitan sa maong insidente.
Girelibuhan na si Ariza.
Matod ni Philippine National Police (PNP) spokesperson Brigadier General Jean Fajardo, nakita ang pito ka mga polis sulod sa usa ka compound diin giingong nipadulong ang suspek human sa pagpamusil.
Sa usa ka press conference niadtong Biyernes, gikuwestiyon ni Espinosa ang presensya sa mga polis sa Ormoc sa lugar, ug nanawagan siya kang Gomez ug Torres nga imbestigahon kini.
Niingon si Espinosa nga walay duhaduha nga politika ang motibo sa pagpamusil, ilabi na nga ang iyang kontra sa pagka-mayor nga si Vince Rama, bayaw ni Torres.
Gilambigit sab ni Espinosa si Department of Public Works and Highways (DPWH) Leyte Fourth District OIC-Assistant Engineer Peter Scheler Soco, kinsa maoy tag-iya sa balay diin nadakpan ang pito ka mga polis atol sa hotpursuit operation.
Gipasanginlan ni Espinosa si Soco nga bagman ni Gomez.
Apan niingon si Gomez nga base sa iyang kaugalingong imbestigasyon, wala gipahigayon nga hot pursuit operation sama sa giingon ni Espinosa.
Hinuon, ang hepe sa Albuera police nga si Major Angelo Sibunga maoy nisulod og kalit sa usa ka pribadong beach resort property diin nagkaon ug nag-barbecue ang mga polis sa Ormoc City, kauban ang kapin 40 ka armadong mga tawo nga kauban ni Espinosa. / TPM / SunStar Philippines
Tags
Politician